martedì 21 agosto 2007

El pomaréto gòbo

No savarìa mia dirve chi che lo ghéa impiantà
mì so che lo gò sempre visto là
su int’el Monte, sól prà dei Rusìti
in mèdo a tuti i altri pomarìti

El géra vegnésto su con quel difèto
mì pensavo: chi sa quanto ch’el gà sofèrto, puaréto…
sa gavaràlo pasà intelà so vita
par podér crésere anca ìlo cóla schéna drita ?!

Se te lo vardàvi da ‘na certa posisión
el paréa ón pòro veciòto in desnoción…
ma se ve conto la santa verità
el ghéva le pì bèle qualità

In primavèra tuto de bianco fiorìo
le ave a ciuciàre no le ghe stava drìo
e d’autùno cói rami carghi de pùmi
quanto bèi che i jéra…e quanto bùni!!

Ma co l’istà la rivava finalmente
e ‘ndàvimo col nòno a fare el fén sol Monte
quel pomaréto gòbo el savéva deventàre
el posto pì bèlo par dugàre

Se rampegàvimo su par la só schéna storta
a dindolàrse, far cavàlo e giravolta
sentài dó in mèdo ai rami, paréa ch’el me volése dare
l’afèto de ‘na mama coi só putèi da rincurare

E come on nòno cola só disendénsa
el me tegnéva in bràso tuti con pasiensa.
Adèso me domando: chisà s’el gavarà sentésto
quanto bèn che ghe ghimo volésto!

Credo che no la sarìa mia ‘ndà cusì pulito
se ‘l pomaréto fùse cresésto drito

Febbraio 2007
(Un melo cresciuto con il tronco curvo è stato uno dei posti più belli in cui giocare quando eravamo piccoli.
Se fosse cresciuto diritto non ci avrebbe regalato quelle gioie!)
Note: la S in grassetto si pronuncia marcata ma non doppia
la X si pronuncia come esse dolce

1 commento:

Pier Giorgio ha detto...

i dise che el sia nato
e rimasto drito par du
o tri ani, na note pero'
un tasso affama' in te na
note freda d'inverno
el gabia scava' soto
par sercare dele raise
par sfamarse PORO CAN anca ilo
scava che te scava se finio
che el pomareto se ga visto mancare
la tera soto e el se ga dovesto
meterse in quela posision che naltri tusiti lo ghimo sempre visto
BELLO E SUGGESTIVO IL RICORDO CHE
HAI AVUTO PER QUESTO ALBERETTO P.P.G.