te lo dise l'arieta
che de jorno la se fa pì tepidina
e l'erbeta
che la scuminsia a deventare verdexina
Te lo dixe i oxeliti
che i salta, i vola, i canta tuti agitai
para che i diga
i jorni pì fridi i xè pasa
Te lo dixe le rivete,
soto i siexuni.
spolverae de crochi, primole e mamolete
e muci de viole che incolora vale e valuni
Ma te lo dixe specialmente
che l'inverno lè drio a far fagoto
quando che se sente
rivare de febraio el vintiòto
I tuxiti de scola
i core casa e i trà dó in parte la cartèla
parchè i gà in mente 'na roba sola:
"Nono, Nono, me detu la campanela?"
Febraio lè finio...
'ndemo a ciamare Marso su e dó par Comarolo!!
I pì piculiti i resta indrìo
e le galine se spaventa par tuto 'sto fisolo
Intei filò rento so le stale
i Vecioti i se conta de 'na volta
l'inverno lè longo da pasare
fa 'ncora fredo sarè su la porta!
Riva Marso!!! Viva Marso!!! che tambramento.
i sbèchi di putèi
i se smìsia con quel gran sonamento
de campanuni e campanei
e tuta la vale se incolora
de quel bel incantamento
che rive la bona stajón xè quasi ora
e intanto uncó ogni toxéto lè contento!
(L'ultimo giorno di febbraio era magico per noi bambini che, suonando i campanelli usati in estate per le mucche, giravamo lungo tutta la vallata per annunciare che arrivava Marzo e quindi, con la primavera, finalmente la bella stagione)
Note:
la S in grassetto si pronuncia marcata ma non doppia
la X si pronuncia come esse dolce
Marzo 2009