Xè qua giugno
anca la scola, ormai, la xè finia
e on bel giòrno pasa in su la vacarìa
da in fondo Comarolo
co’n gran sonamento, la sintivimo rivare,
e i putei coréa dó so la strada par véderla pasare
quel bacan el paréa ‘na festa,
‘na musica…come ‘na litania
cantà da quela granda vacarìa
quela longa procesion
partìa a l’alba da indó, da la campagna
la se rampegava piampian su pa la montagna
bele vache grase e tante vedeléte
co le cioche e campanele al colo
le risonava par tuta la vale de Comarolo
i paruni co i can e cui bastuni
i le para vanti, i le fa filare
la strada la xè longa pa rivare
i ciama par nome le pì vecie ..Bisa!! Bandiera!!…
ile se ricorda ben de i ani pasai
parchè sti posti no le li gà mai desmentegai
i scorla pjini de late i pjiti…
i burli e quel gran scampanamento
come se fuse jiri ‘ncora li sento
e co riva sto jorno benedeto
quando che la vacarìa la xè pasà
vol dire che xè proprio qua l’istà
resta i putei e la strada ben ingrasà
dopo che sto pasajo xè finio….
…fin che in setembre la vacarìa la torna indrìo
(Le grandi mandrie di mucche transumavano a inizio estate dalla pianura ai monti dell'altopiano dove pascolavano beatamente, producendo delizioso e prezioso latte,tra i boschi e i freschi prati. E per noi bambini che festa quel giorno!)
Giugno 2008
Note: la S in grassetto si pronuncia marcata ma non doppia
la X si pronuncia come esse dolce
