Setembre el te incanta…
con quele jornadine tepide
e quel’arieta molexina
che la supia con tanta legeresa
so l’erba di prai, come ‘na caresa!
I arduri de l’istà e del solleón
finalmente i se chieta,
se cava fià e ‘l sole deventa bon
sui prai de tuta la valata
pascola le vache
e mande e vedelete de ogni età
vegneste dó da la montagna
dopo l’istà
e ‘na putèla,
tegnendo soto ‘l braso la cordela,
la porta so’l Gècole la Bixa e la Toscana
parandole co ‘na bachetèla
I duga cuntinti i tuxiti
a córerse drìo
e la jente camina
e serca e cata ogni bendiDio
soto i siexùni, drìo i prai
quanta bona roba che la tèra la ghe dà
par nutrirse e combatre la povertà
Sui fili de la luce
le sixìle se raduna par cantare
e pareciarse tute insieme
par quel longo viajo verso ‘l mare
Settembre 2008
Note: la S in grassetto si pronuncia marcata ma non doppia
la X si pronuncia come esse dolce
